२०८२ भदौ १ धनुषा : धनुषाको मिथिला बिहारी नगरपालिका–३ मिथिलेश्वर मौवाहीस्थित जनमुक्ति चौकमा सहिद चन्देश्वर मण्डलको २० औं स्मृति सभा भव्यतापूर्वक सम्पन्न भएको छ ।
स्मृति सभामा नेकपा (माओवादी केन्द्र) का उपाध्यक्ष तथा पूर्वमन्त्री पम्फा भुसाल प्रमुख अतिथि रहनु भएको थियो । कार्यक्रममा विशिष्ट अतिथिका रूपमा पार्टीका केन्द्रीय उप महासचिव तथा मधेस प्रदेश इन्चार्ज मातृकाप्रसाद यादव, केन्द्रीय सदस्य तथा धनुषा जिल्ला इन्चार्ज श्रावण बरवरिया यादव उपस्थित हुनु भएको थियो । सोही अवसरमा धनुषा जिल्ला संयोजक दिपक यादव, सुनिल यादव, रोशन यादव, देव सागर दास, जनसांस्कृतिक महासंघ मधेस प्रदेश समितिका संयोजक राजेश सक्सेना लगायतका नेताहरूको पनि उपस्थिति रहेको थियो ।
कार्यक्रमको अध्यक्षता नगर कमिटीका अध्यक्ष प्रदीप साहले गर्नुभएको थियो भने सञ्चालन नगर कमिटीका सचिव तथा मिथिला बिहारी नगरपालिका – ७ का वडाध्यक्ष संजय शर्माले गर्नुभएको थियो । स्वागत मन्तव्य मेयर प्रत्यासी सूर्यनारायणले गर्नुभएको थियो ।
मिथिला बिहारी नगरपालिका भित्रका जनयुद्धमा सहिद भएको सहिद परिवारहरुलाई सम्मान गरिएको थियो । स्मृति दिवसको अवसरमा आयोजित रक्तदान कार्यक्रम ४५ जनाले रक्तदान गरेका थिए ।
कार्यक्रमलाई सम्बोधन गर्दै विशिष्ट अतिथि मातृकाप्रसाद यादवले सहिदहरूको बलिदानबाट प्रेरणा लिनुपर्ने बताउँदै पार्टीभित्रको गुटबन्दी र कमजोरीप्रति चिन्ता व्यक्त गर्नुभयो ।
त्यसैगरी, प्रमुख अतिथि पम्फा भुसालले वर्तमान सरकारको गतिविधि सुशासनविरोधी, भ्रष्टाचार प्रवर्द्धन गर्ने खालको रहेको आरोप लगाउनुभयो । उहाँले भूमि सम्बन्धी कानुन, निजामति ऐन, शिक्षा विधेयक जस्ता विषयमा सरकारले अपनाएको नीतिले संघीयता र समावेशी लोकतन्त्र कमजोर बनाउने खतरा बढेको बताउनुभयो ।
संघीय कार्यान्वयनका लागि अत्यावश्यक कानुनमाथि सरकार उदासीन भएको टिप्पणी गर्दै भुसालले संविधानको मर्म विपरीत निर्णय भइरहेको आरोप लगाइन् । उहाँले नेकपा एकीकृत समाजवादी, विप्लव समूहको नेकपा, जनता समाजवादी पार्टीलगायतसँग पार्टी एकीकरणका विषयमा सकारात्मक वार्ता भइरहेको जानकारी समेत दिनुभयो ।
कार्यक्रममा सहभागी नेताहरूले सहिद चन्देश्वर मण्डलको योगदानलाई स्मरण गर्दै उहाँको सपनालाई पूरा गर्न दल र जनताबीचको एकता अपरिहार्य रहेको बताएका थिए ।
