२०८२ भदौ ०७ जनकपुरधाम : नेकपा (माओवादी केन्द्र) अन्तर्गतको भातृ संगठन मधेसी मुक्ति मोर्चाको नगर सम्मेलन हंसपुर नगरपालिकामा सम्पन्न भएको छ । नगर सम्मेलन हंसपुर नगरपालिका–५ हंसपुर बेलही चौकमा भव्यताका साथ आयोजना गरिएको थियो ।
सम्मेलनले २१ सदस्यीय नगर समिति गठन गरेको छ । जसअन्तर्गत अध्यक्षमा कामेश्वर कापर, उपाध्यक्षमा नन्दलाल सहनी र श्रवण मण्डल, सचिवमा शिव दयाल साह, सहसचिवमा श्याम मण्डल (विशाल) तथा कोषाध्यक्षमा समिना खातुन चयन भएका छन् ।
त्यसैगरी सदस्यहरूमा घुरन मण्डल, ज्ञानी यादव, राम प्रसाद ठाकुर, रामबरन कापर, बिन्देश्वर दास, जय प्रकाश मण्डल, चथरु यादव, भागरथी देवी, सगम लाल पासमान, तेतर दास र सत्य नारायण शर्मा लगायत रहेका छन् ।
कार्यक्रममा प्रमुख अतिथिको आसन माओवादी केन्द्र नगर कमिटीका अध्यक्ष सुनिल यादवले ओगटेका थिए भने विशिष्ट अतिथिका रूपमा मधेसी मुक्ति मोर्चा धनुषा जिल्ला अध्यक्ष बिजय यादव, जनसांस्कृतिक महासंघ, मधेस प्रदेश समितिका अध्यक्ष राजेश सक्सेना, वाईसिएल नेपाल धनुषा जिल्ला इन्चार्ज जय प्रकाश मण्डललगायत नेताहरू सहभागी रहेका थिए ।
अतिथिहरूले आफ्नो सम्बोधनका क्रममा मधेसी समुदायको हक अधिकार र समानुपातिक सहभागिताका लागि संघर्षरत मधेसी मुक्ति मोर्चाको भूमिकाको प्रशंसा गर्दै नवनिर्वाचित नगर समिति प्रति बधाई ज्ञापन गरेका थिए । उनीहरूले संगठनलाई अझ सशक्त र गतिशील बनाउनुपर्नेमा जोड दिएका थिए ।
कार्यक्रममा स्थानीय स्तरका विभिन्न सामाजिक अगुवा, पार्टीका कार्यकर्ता तथा सर्वसाधारणको उल्लेखनीय सहभागिता रहेको थियो । सम्मेलनले आगामी दिनमा संगठनलाई गाउँ–गाउँमा विस्तार गर्दै मधेसी जनताको अधिकार प्राप्तिका लागि संघर्षलाई निरन्तरता दिने प्रतिबद्धता व्यक्त गरेको छ ।
