मुलुकभित्र आन्तरिक र वाह्य लगानी प्रवर्द्धनका लागि उद्योग वाणिज्य महासंघ (एफएनसीसीआई) र लगानी बोर्डबीच सम्झौता भएको छ । अर्थमन्त्री जनार्दन शर्माको उपस्थतिमा महासंघका अध्यक्ष शेखर गोल्छा र बोर्डका प्रमुख कार्यकारी अधिकृत सुशिल भट्टले सम्झाैतामा हस्ताक्षर गरे ।
सहमतिअनुसार अब महासंघको सचिवालयमा प्रत्यक्ष वैदेशिक लगानी सम्बन्धी सहायता कक्ष स्थापना गरिने छ । सहायता कक्षको संचालनमा बोर्डका तर्फबाट प्राविधिक सहयोगका साथै सहायता कक्षको क्षमता अभिवृद्धि, सीप विकास र ज्ञानको आदानप्रदानमा सहयोग हुनेछ । महासंघले राष्ट्रको आवश्यकता अनुसार लगानी परियोजनाको पहिचान, अन्तर्राष्ट्रियरुपमा आफ्नो माध्यम मार्फत लगानीकर्ताको खोजी गर्ने कार्यमा बोर्डलाई सहयोग गर्ने छ ।
महासंघको अन्तर्राष्ट्रिय लगानी प्रवर्द्धन समितिले लगानी प्रवर्द्धनका लागि तयार गर्ने सबै दस्तावेजहरुमा बोर्डले सहयोग गर्ने छ । त्यसैगरी दुवै संस्थाले लगानी सम्बन्धी तथ्यांक, प्रतिवेदन, संयुक्त रुपमा तयार पारिएका प्रतिवेदनहरु, वाह्य लगानी आकर्षणमा देखा परेका चुनौती तथा अवसरहरु र सार्वजनिक निजी साझेदारीमा लगानी सम्बन्धी नीति पैरवी लगायतमा सहयोग, सहकार्य, आदान प्रदान गर्नेछन् । महासंघले लगानीका अवसर सम्बन्धी डाइरेक्टरीको तयारीमा पनि सहयोग गर्नेछ । त्यसैगरी दुवै संस्थाले सबै प्रकारका लगानी, परियोजना विकास लगायतमा संयुक्त रुपमा अध्ययन अनुसन्धानमा समेत सहकार्य गर्नेछन् ।
सो कार्यक्रममा बोर्डका उपाध्यक्ष तथा अर्थमन्त्री शर्माले यो सहमतिबाट सिंगो राष्ट्र नै लाभान्वित हुने बताए । उनले लगानी गर्न आउनेलाई प्रतिफलको पनि स्पष्ट खाका दिन सक्नुपर्ने सुझाव दिए । लगानी बोर्डका प्रमुख कार्यकारी अधिकृत भट्टले मुलुकभित्र आन्तरिक एवम् वाह्य लगानी प्रवर्द्धन नै सम्झौताको मुख्य लक्ष्य भएको बताए । महासंघका अध्यक्ष शेखर गोल्छाले महासंघको सचिवालयमा बोर्डको समेत संलग्नता र सहयोगमा खुल्ने सहायता कक्षले ठोस परिणाम दिने विश्वास जनाए ।
